Një delegacion i Komisionit për Evropën dhe Punët e Jashtme të Kuvendit të Shqipërisë zhvilloi një vizitë zyrtare në Madrid, me ftesë të kryetares së Komisionit të Punëve të Jashtme të Senatit të Spanjës, Pilar Rojo Niguera.

Delegacioni shqiptar u kryesua nga Igli Hasani dhe përbëhej nga deputetët Albana Vokshi, Skënder Pashaj dhe Vangjel Dule. Delegacioni u shoqërua nga ambasadorja e Shqipërisë në Spanjë, Entela Gjika.

Gjatë takimeve, palët diskutuan mbi forcimin e marrëdhënieve dypalëshe mes Shqipëria dhe Spanja, bashkëpunimin parlamentar, zhvillimet rajonale dhe procesin e integrimit evropian të Shqipërisë.

Mbështetja e Spanjës për rrugën evropiane të Shqipërisë ishte në qendër të bisedimeve.

Kryetari i delegacionit shqiptar, Igli Hasani, vlerësoi mbështetjen e vazhdueshme të autoriteteve spanjolle ndaj perspektivës evropiane të vendit dhe theksoi rëndësinë e vijimit të reformave në kuadër të negociatave me Bashkimin Evropian.

Sipas Hasanit, anëtarësimi në Bashkimin Evropian mbetet një interes kombëtar dhe një tregues i orientimit të palëkundur euroatlantik të Shqipërisë.

Në fokus të diskutimeve ishin gjithashtu sfidat e sigurisë në Evropë, zhvillimet gjeopolitike në rajon, si dhe nevoja për forcimin e bashkëpunimit ndërinstitucional mes vendeve aleate dhe partnere.

Përfaqësuesit spanjollë ritheksuan mbështetjen për procesin e integrimit evropian të Shqipërisë dhe nënvizuan rëndësinë e vazhdimit të reformave për avancimin e mëtejshëm të negociatave me Bashkimin Evropian.

Palët vlerësuan gjithashtu se arsimi, bashkëpunimi ushtarak dhe turizmi mbeten ndër sektorët me potencial të lartë për zgjerimin e bashkëpunimit mes dy vendeve.

Burimi ATSH