Për të tretin vit radhazi po vijon lufta biologjike kundër grerëzës së gështenjës (Dryocosmus kuriphilus).

Ministri i Mjedisit, Sofjan Jaupaj tha se ky dëmtues rrezikon masivet e gështenjës në vendin tonë.

“Me mbi 10 670 hektarë sipërfaqe dhe rreth 250 mijë tonë prodhim në vit, gështenja shqiptare ka qenë ndër produktet tona më të vlerësuara në tregjet ndërkombëtare, duke e renditur Shqipërinë mes vendeve kryesore eksportuese. Duke mbrojtur gështenjën, mbrojmë biodiversitetin, tokën nga erozioni dhe një trashëgimi të vyer për brezat që vijnë”, theksoi Jaupaj, në një postim sot në rrjetet sociale.

Specialistët e Ministrisë së Mjedisit theksojnë se pyjet e gështenjës janë një pasuri e çmuar natyrore, ekonomike dhe kulturore.

Ata bëjnë apel për mbrojtjen e kësaj pasurie natyrore.

“Vetëm përmes bashkëpunimit mund të ruajmë këtë trashëgimi të vyer për brezat që do të vijnë. Sot veprojmë për pyjet, nesër gëzojmë frytet e tyre”, theksojnë ata në videon promovuese të publikuar nga Jaupaj.

Pyjet e gështenjës janë një pasuri e çmuar e natyrës shqiptare, me vlera të mëdha ekonomike, ushqimore dhe mjedisore. Gështenja është një lloj druri pyjor i përhapur në shumë zona të Shqipërisë. Ajo ka vlera të jashtëzakonshme për mbrojtjen e tokës nga erozioni, si dhe përdoret si lëndë e parë në sektorë të ndryshëm.

Burimi ATSH