Këshilli i Ministrave miratoi sot projektligjin “Për Censin e Bujqësisë”, i cili përcakton kuadrin ligjor për organizimin dhe zhvillimin e regjistrimit të përgjithshëm të njësive ekonomike bujqësore në të gjithë vendin.

Nisma synon mbledhjen e të dhënave të detajuara mbi fermat dhe aktivitetet bujqësore, duke krijuar një bazë të besueshme statistikore dhe regjistrin statistikor të njësive ekonomike bujqësore në Shqipëri.

Sipas projektligjit, censi do të përfshijë të gjitha njësitë që përdorin tokë bujqësore ose ushtrojnë veprimtari në fushën e bujqësisë dhe blegtorisë, pavarësisht nëse prodhimi i tyre është i destinuar për treg apo për konsum familjar. Procesi do të sigurojë mbulimin e të paktën 98% të sipërfaqes së përdorur për bujqësi, me përjashtim të kopshtarisë, si dhe 98% të njësive blegtorale në nivel kombëtar.

Projektligji parashikon që pyjet dhe kullotat publike të mos përfshihen në census, përveç rasteve kur ato përdoren drejtpërdrejt nga fermat dhe njësitë ekonomike bujqësore për zhvillimin e aktivitetit të tyre.

Përgjegjës për realizimin e censit do të jetë Instituti i Statistikave(INSTAT), i cili do të kujdeset për planifikimin, organizimin, administrimin e procesit dhe publikimin e rezultateve.

Sipas projektligjit, të dhënat që do të gjenerohen nga ky census do të shërbejnë si një instrument i rëndësishëm për hartimin e politikave të zhvillimit të bujqësisë dhe mbështetjen e zhvillimit rural në vend.

Burimi ATSH