Duke nisur nga data 11 qershor, qytetarët do të kenë në dispozicion një platformë të re online për të denoncuar abuzimet dhe shkeljet e ligjit nga bizneset apo përfaqësues të institucioneve publike. Lajmi u bë i ditur nga kryeinspektori i përgjithshëm, Dashnor Sula, gjatë një takimi të zhvilluar në Durrës.

Sipas Sulës, platforma informuese dhe sinjalizuese “sigurt.gov.al”, së bashku me Linjën e Gjelbër, do t’u mundësojë qytetarëve të raportojnë në kohë reale çdo rast abuzimi apo shkeljeje të konstatuar, veçanërisht gjatë sezonit turistik.

“Me datë 11 qershor, do të hapet një platformë informuese, sinjalizuese, sigurt.gov.al dhe Linja e Gjelbër, që çdo qytetar, kur shikon, kur vëren abuzim, shkelje të ligjit, nga subjektet të cilat janë të papërgjegjshme dhe janë përfitues, abuzues ndaj turistëve apo çdo pushuesi të Republikës së Shqipërisë”, tha Sula.

Kryeinspektori bëri të ditur gjithashtu se përgjatë gjithë vijës bregdetare do të ngrihet një task-forcë e posaçme për monitorimin e aktiviteteve tregtare dhe garantimin e respektimit të standardeve ligjore. Vëmendje e veçantë do t’i kushtohet sigurisë ushqimore gjatë sezonit veror.

“AKU do të jetë vigjilente, në gatishmëri të plotë për të bërë të mundur çdo parakalim të abuzimit të subjekteve me pakicë apo shumicë”, tha ai.

Gjatë vizitës në Durrës, Sula zhvilloi një takim me drejtuesit e inspektoriateve rajonale, ku kërkoi angazhim maksimal dhe vigjilencë të shtuar, veçanërisht gjatë muajve të verës, kur fluksi i turistëve dhe pushuesve është më i lartë.

Burimi ATSH