Në Parkun Arkeologjik Amantia, rreth 30 kilometra në juglindje të qytetit të Vlorës janë zbuluar gjurmë të jetës antike, mure fortifikuese dhe godina që mbajnë ende mistere të pazgjidhura.

Në përfundim të gërmimeve në këtë park arkeologjik u kryen zbulime të rëndësishme për njohjen e organizimit urbanistik dhe historisë së këtij qyteti antik.

Ministri i Turizmit, Kulturës dhe Sportit, Blendi Gonxhja ndau sot disa të dhëna nga gërmimet që u zhvilluan nga Drejtoria Rajonale e Trashëgimisë Kulturore Vlorë dhe Instituti Kombëtar i Trashëgimisë Kulturore.

Gonxhja theksoi se gërmimet nxorën në dritë një godinë antike në zonën e agorasë, si edhe të dhëna të reja mbi fortifikimin e qytetit të poshtëm, duke dëshmuar vazhdimësinë e jetës dhe zhvillimit të Amantias nga shek. III p.Kr. deri në shek. VI m.Kr.

Ministri informoi se kërkimet do të vijojnë edhe në vitet e ardhshme, së bashku me ndërhyrje restauruese që synojnë ruajtjen dhe promovimin e kësaj pasurie të çmuar të trashëgimisë sonë kulturore.

Amantia u themelua në fund të shek. V para Krishtit. Ajo ndodhet në një kodër në zonën e Labërisë dhe është e fortifikuar me mure.

Në shek. III para Krishtit, qyteti u forcua ekonomikisht dhe nxori monedhat e tij të para. Në vitin 268 para Krishtit, qyteti preu monedhën e vet. Sot ka ende gjurmë të tempullit të Afërditës, teatrit dhe stadiumit.

Burimi ATSH