Ministrja e Arsimit, Mirela Kumbaro informoi sot se në 30 shkolla me rreth 2000 nxënës dhe 60 mësues të trajnuar ka nisur projekti “Eduten” për mësimin e lëndës së matematikës.

Kumbaro gjatë një takimi me mësues dhe nxënës të shkollës “Kosova” në kryeqytet, u shpreh se ky projekt ka dhënë rezultate konkrete pozitive të arritjeve te nxënësit që janë pjesë e “Eduten”, platforma digjitale për mësimin e matematikës.

“Teksa ky projekt i nisur në 30 shkolla me rreth 2000 nxënës dhe 60 mësues matematike të trajnuar po jep frytet e para, bashkë me UNICEF Albania po diskutojmë mundësi të zgjerimit të “Eduten” në të ardhmen”, tha Kumbaro.

Programi “Eduten” është një nismë novatore që vendos në qendër fëmijët, mësuesit dhe të mësuarit nëpërmjet lojës të lëndës së matematikës.

“Eduten” kombinon metoda efektive të mësimdhënies me teknologjinë moderne, për ta bërë të nxënit e matematikës argëtues, gjithëpërfshirës dhe efikas.

Burimi ATSH