Platforma e-Albania po zgjeron aksesin në shërbimet publike online përmes versionit të ri e-Albania 2.0, duke i bërë ato të përdorshme në mënyrë të pavarur edhe për personat e komunitetit që nuk shikojnë.

Për herë të parë, me e-Albania 2.0, personat e komunitetit që nuk shikojnë mund të përdorin shërbimet publike online në mënyrë të pavarur, të thjeshtë dhe pa barriera.

Në një videomesazh të publikuar me këtë rast, Emiliano Lule theksoi rëndësinë e këtij zhvillimi për komunitetin.

“Që prej vitit 2020 platforma e-Albania ofron 95% të shërbimeve publike online. Falë teknologjisë së re, sot shërbimet online ofrohen edhe për personat me aftësi ndryshe. 13 100 persona të komunitetit të njerëzve që nuk shikojnë, së bashku me mua, do të mund të marrin 400 shërbime online. Unë mund të logoj vetë dhe mund të aplikoj për shërbimin që më nevojitet”, u shpreh Lule.

Ai vlerësoi se aksesi në këtë platformë përfaqëson barazi reale për qytetarët.

“Aksesi në këtë platformë është barazi dhe kjo është e-Albania e re, platforma e pakufizuar për çdo kënd”, tha Lule.

Me versionin e ri, e-Albania 2.0 synon të ofrojë një eksperiencë më të avancuar digjitale, duke e bërë aksesin në shërbimet publike më të thjeshtë, më të shpejtë dhe gjithëpërfshirës për të gjithë qytetarët.

Burimi ATSH