Administratori i Postës Shqiptare, Etjen Xhafaj dhe homologu i tij malazez, Josip Djuraskoviç, nënshkruan sot Memorandumin e Bashkëpunimit, duke shënuar një hap të rëndësishëm në forcimin e shërbimeve postare dhe financiare mes dy vendeve.

Xhafaj e cilësoj këtë bashkëpunim një hap të rëndësishëm drejt një epoke të re të modernizimit dhe bashkëpunimit rajonal.

“Objektivat tanë të përbashkët synojnë: Digjitalizimin, inovacionin dhe integrimin e teknologjive të reja. Mbështetjen e tregtisë elektronike (e-commerce) dhe lehtësimin e transportit tokësor”, u shpreh Xhafaj.

Marrëveshja synon rritjen e bashkëpunimit në shërbimet postare, financiare dhe bankare, mbështetjen e tregtisë elektronike dhe përmirësimin e shkëmbimit të dërgesave postare në rrugë tokësore, me qëllim lehtësimin e tregtisë rajonale.

Gjithashtu parashikohet optimizimi i transfertave të parave dhe shkëmbimi i eksperiencave operacionale dhe garantimi i sigurisë maksimale dhe mbrojtjes së të dhënave personale.

“Angazhimi ynë mbetet i qartë, inovacion i vazhdueshëm dhe shërbime më të sigurta e bashkëkohore për qytetarët tanë”, tha Xhafaj.