Kryeinspektori i Përgjithshëm, Dashnor Sula, deklaroi nga Vlora se inspektoratet do të forcojnë kontrollet në terren në prag të sezonit turistik veror, me fokus të veçantë tek ndërtimet pa leje, siguria ushqimore dhe mbrojtja e mjedisit.

Në një takim me drejtues dhe punonjës të inspektorateve rajonale në Vlorë, Sula theksoi se zonat bregdetare, përfshirë Vlorën, mbeten problematike për shkak të ndërtimeve informale.

“Të jeni të sigurtë që çdo subjekt sot në të gjithë vendin do t’i nënshtrohet çdo kontrolli dhe kategorizimi. Toleranca është zero për arsye sepse kërkohet nga kapitulli i 12-të i negociatave të Bashkimit Europian”, tha Sula.

Ai informoi gjithashtu mbi ngritjen e një platforme të re sinjalizimi për qytetarët, si dhe funksionimin e linjës së gjelbër 0800, që do të mundësojë raportimin e shkeljeve në kohë reale.

“Javën tjetër fillon funksionimi i portalit sigurt.gov.al dhe i linjës së gjelbër 0800, pikërisht për të pasur mundësinë e sinjalizimeve nga qytetarët për problematikat”, u shpreh ai.

Sula theksoi se çdo inspektorat do të ngrejë taskforca për monitorimin e subjekteve tregtare në vijën bregdetare, me qëllim garantimin e standardeve të shërbimit gjatë sezonit turistik.

Duke folur për ndërtimet pa leje, Sula e cilësoi Vlorën si një nga zonat më problematike, duke shtuar se strukturat e kontrollit do të jenë të angazhuara në mënyrë të vazhdueshme për parandalimin e shkeljeve.

Marrë nga ATSH