Platforma e re e-Albania 2.0 është ridizenjuar tërësisht, për të garantuar akses më të sigurt dhe më të shpejtë për qytetarët dhe bizneset.

Agjencia Kombëtare e Shoqërisë së Informacionit (AKShI) njofton se kjo platformë e re është ndërtuar mbi një infrastrukturë tërësisht të modernizuar dhe është një tjetër hap në transformimin digjital të shërbimeve publike në Shqipëri.

“Platforma e re vjen e ridizenjuar mbi një infrastrukturë tërësisht të modernizuar, për të ofruar një eksperiencë më të shpejtë, më të sigurt dhe më intuitive për qytetarët dhe bizneset. E ndërtuar me teknologji të avancuara dhe standarde moderne të performancës, e-Albania 2.0 garanton më shumë qëndrueshmëri, efikasitet dhe besueshmëri në çdo shërbim online”, thuhet në njoftimin e AKShI-t.

Platforma sjell një nivel të ri aksesueshmërie dhe gjithëpërfshirjeje, duke mundësuar përdorim më të lehtë edhe për personat me aftësi të kufizuara, në funksion të një shërbimi publik digjital pa barriera dhe të barabartë për të gjithë.

Sipas AKShI-t, për bizneset, e-Albania 2.0 prezanton funksionalitete të reja për menaxhimin e autorizimeve dhe delegimin e përkohshëm të përdorimit të shërbimeve elektronike, me kontroll të plotë dhe fleksibilitet.

Sistemi i ri i verifikimit sjell më shumë siguri për përdoruesit përmes metodave të avancuara të verifikimit me dy faktorë.

Platforma “e-Albania” shërben si një portë nëpërmjet së cilës çdo person i interesuar mund të marrë nëpërmjet internetit, shërbime elektronike të ofruara nga institucionet publike në Shqipëri.

Burimi ATSH