Projekti “EU for Democracy”, një partneritet mes Kuvendit të Shqipërisë, Bashkimit Europian dhe International IDEA, synon forcimin e rolit të Kuvendit në procesin e anëtarësimit në BE.

Kryetari i Kuvendit Niko Peleshi vlerësoi se projekti do të mbështesë fuqizimin e funksioneve të Kuvendit dhe modernizimin e shërbimeve parlamentare, rritjen e transparencës dhe forcimin e bashkëpunimit me qytetarët, median dhe shoqërinë civile.

“Shqipëria është sot më pranë se kurrë Bashkimit Europian dhe Kuvendi do të vazhdojë të luajë një rol kyç në këtë rrugëtim historik”, shkruan Peleshi.

“EU for Democracy” është një nismë e financuar nga Bashkimi Europian dhe e zbatuar nga International IDEA në bashkëpunim me Kuvendin e Shqipërisë, me fokus forcimin e demokracisë parlamentare dhe mbështetjen e procesit të integrimit europian.

Projekti synon të rrisë kapacitetet e Kuvendit në procesin e negociatave me BE-në; të modernizojë administratën dhe shërbimet parlamentare; të përmirësojë mekanizmat e mbikëqyrjes dhe transparencës; të forcojë bashkëpunimin me qytetarët, median dhe shoqërinë civile.

Burimi ATSH