Këshilli i Ministrave ka miratuar krijimin e bazës së të dhënave shtetërore të Platformës Elektronike të Raportimit Financiar (PERF), një sistem i ri digjital që synon rritjen e transparencës dhe kontrollit mbi financimin e partive politike dhe subjekteve zgjedhore.

Sipas vendimit, institucioni administrues i kësaj baze të dhënash do të jetë Komisioni Qendror i Zgjedhjeve (KQZ), i cili do të ketë akses të plotë administrativ dhe funksional mbi sistemin.

Sipas vendimit, baza e të dhënave PERF do të përfshijë një gamë të gjerë informacioni financiar dhe administrativ, të ndarë në të dhëna parësore dhe dytësore.

Të dhënat parësore përfshijnë raportet financiare vjetore të partive politike, raportet e fushatave zgjedhore, burimet e financimit, shpenzimet, dhurimet monetare dhe në natyrë, huatë dhe kreditë, si dhe dokumentacionin shoqërues dhe raportet e auditimit.

Ndërkohë, të dhënat dytësore do të sigurohen nga baza të tjera shtetërore, për qëllime identifikimi dhe verifikimi, përfshirë të dhëna nga Regjistri Kombëtar i Gjendjes Civile dhe sistemi “Tatimi elektronik”.

Sistemi do të ndërveprojë me bazat e të dhënave të Drejtorisë së Përgjithshme të Gjendjes Civile dhe Drejtorisë së Përgjithshme të Tatimeve, duke mundësuar verifikim më të saktë të informacionit të deklaruar.

Vendimi thekson se përpunimi i të dhënave personale do të kryhet në përputhje me legjislacionin për mbrojtjen e të dhënave personale, ndërsa të dhënat do të ruhen vetëm për aq kohë sa është e nevojshme për qëllimin e tyre, duke u fshirë ose anonimizuar më pas.

Sistemi PERF parashikon nivele të ndryshme aksesi sipas roleve, duke filluar nga KQZ me akses të plotë, deri te partitë politike, kandidatët, financierët, audituesit ligjorë dhe monitoruesit e fushatës me akses të kufizuar sipas funksioneve të tyre.

KQZ do të jetë përgjegjëse për marrjen e masave teknike dhe organizative për mbrojtjen e të dhënave nga keqpërdorimi, ndërsa çdo veprim në sistem do të regjistrohet për qëllime sigurie dhe auditimi.

Për zbatimin e vendimit ngarkohen Komisioni Qendror i Zgjedhjeve dhe Agjencia Kombëtare e Shoqërisë së Informacionit, ndërsa hyn në fuqi pas botimit në “Fletoren Zyrtare”.

Burimi ATSH