Kryetari i bordit të Fondacionit Shqiptaro-Amerikan për Zhvillim (AADF), Michael Granoff, e cilësoi si një ditë të rëndësishme nënshkrimin e marrëveshjes mes Ministrisë së Arsimit dhe AADF-së për modernizimin e sistemeve të vlerësimit në Agjencinë e re Kombëtare të Shërbimeve Arsimore, në përputhje me standardet ndërkombëtare dhe përmes ekspertizës së Universitetit të Kembrixhit, duke iu përshtatur edhe kërkesave të epokës digjitale në arsim.

Në ceremoninë e zhvilluar në prani të kryeministrit Edi Rama dhe ministres së Arsimit, Mirela Kumbaro, Granoff vlerësoi këtë hap si një etapë të rëndësishme në progresin e bashkëpunimit të fondacionit në Shqipëri, në rolin e tij si katalizator së bashku me partnerët qeveritarë dhe Universitetin e Kembrixhit.

“Sot është një ditë e rëndësishme, një etapë e rëndësishme gjithashtu në progresin e asaj që fondacioni ka arritur të bëjë në Shqipëri si katalizator me partnerët tanë në qeveri dhe tani me Kembrixhin. Që prej fillimit kemi dashur të identifikojmë fushat dhe çështjet ku mund të bëjmë një ndryshim të konsiderueshëm”, u shpreh Granoff.

Ai theksoi se arsimi është një fushë komplekse, ku problemet nuk zgjidhen me zgjidhje të thjeshta dhe të shpejta, ndërsa nënvizoi se është një nga sektorët më vendimtarë për të ardhmen e vendit.

“Nuk duhet të shikosh shumë larg, mjafton të shohësh sistemin arsimor për të kuptuar drejtimin e një vendi. Në disa raste është e natyrshme që financimi të përqendrohet te arsimi, por problematikat janë të mëdha dhe nuk janë të thjeshta”, tha ai.

Granoff shtoi se sfidat lidhen jo vetëm me mësimdhënien dhe nxënësit, por edhe me infrastrukturën dhe arkitekturën e sistemit arsimor, duke e krahasuar atë me themelet e një ndërtese.

“Prandaj është e domosdoshme të ndërtojmë një arkitekturë të fortë dhe të qëndrueshme”, theksoi ai.

Sipas tij, objektivi kryesor është krijimi i një sistemi ku nxënësit dhe të gjithë aktorët e arsimit të kenë besim te integriteti i tij.

“Besimi kërkon kohë për t’u ndërtuar, por mund të shkatërrohet shumë shpejt. Prandaj duhet të jemi të kujdesshëm në këtë drejtim”, u shpreh Granoff.

Ai theksoi gjithashtu rëndësinë e partneriteteve ndërkombëtare, duke vlerësuar Universitetin e Kembrixhit si një lider botëror në këtë fushë.

“Përmes këtij bashkëpunimi synojmë të sjellim në Shqipëri sisteme dhe praktikat më të mira ndërkombëtare. Ky nuk është një angazhim i përkohshëm, por një partneritet afatgjatë që kërkon kohë për të dhënë rezultate dhe për të ndërtuar arkitekturën dhe infrastrukturën që duam”, u shpreh Granoff.

Burimi ATSH