Në Shërbimin e Okulistikës në QSUT janë realizuar me sukses dy ndërhyrjet e para të vitrektomisë tek pacientë me humbje të shikimit, duke sjellë një përmirësim të ndjeshëm të gjendjes së tyre.

Vitrektomia është një ndërhyrje kirurgjikale e avancuar e syrit, e cila tashmë, falë investimit në pajisje moderne ofrohet falas për pacientët që kanë nevojë, duke garantuar trajtim cilësor nga një ekip i specializuar mjekësh.

Sipas mjekëve kirurgë në Shërbimin e Okulistikës në QSUT për kryerjen e kësaj ndërhyrjeje janë përzgjedhur dy pacientë me humbje të plotë shikimi.

Nga shërbimi do të përfitojë një paciente 57 vjeçe me humbje shikimi prej 15 vitesh e cila sipas mjekëve në përfundim të ndërhyrjes do të rifitojë shikimin.

Ndërsa pacienti i dytë, i operuar prej 15 vitesh për katarakt do të përfitojë po ashtu kirurgjinë e vitrektomisë për të mbajtur stabël retinën.

“Për herë të parë realizohet kjo ndërhyrje kirurgjikale ku këta të sëmurë nuk kanë nevojë të presin radhë të gjata dhe shpenzime marramendëse në klinika private jashtë. Pacientët do të përfitojnë totalisht pamjen dhe brenda ditës do të largohen në shtëpi, ku me një mjekim dyjavor topikal me pika realizohet plotësisht me shumë sukses rikthimi i shikimit”, tha mjeku.

Burimi ATSH