Himara ka çelur sot zyrtarisht sezonin e ri veror. E shtrirë përgjatë datave 1-3 maj hapja e sezonit turistik është konceptuar nga bashkia Himarë si një paketë e plotë aktivitetesh të shtrira përgjatë këtyre ditëve.

Sot është zhvilluar një minimaratonë vrapimi “Himara Run Fest” me nxënësit e shkollave, e konceptuar si një vrapim përgjatë bregdetit dhe mes natyrës. Aktivitete sportive janë zhvilluar edhe buzë detit, si vollejboll plazhi apo gara me kajakë, që sollën një atmosferë të gjallë verore. Edhe fëmijët ishin pjesë e rëndësishme e nisjes së sezonit turistik, me lojëra e argëtime të ndryshme.

Pjesë e aktiviteteve ishte edhe orkestra simfonike e Foracave të Armatosura, që solli tinguj festivë që në orët e para të mëngjesit.

Gjithashtu, Muzeu Historik Kombëtar sjell në shesh përgjatë tri ditëve një eksperiencë unike për të gjithë: Ekspozitë fotografike; Lojëra edukative; Aktivitete praktike për të gjitha moshat.

Panairi i artizanatit dhe i kulinarisë solli aromat dhe ngjyrat e Himarës.

E shtrirë përgjatë Rivierës shqiptare, në jug të vendit, Himara është një nga destinacionet më magjepsëse të bregdetit shqiptar, ku ujërat e kaltër të Jonit takohen me kodrat e gjelbra dhe historinë mijëravjeçare. Ky qytet bregdetar ndodhet në qarkun e Vlorës, rreth 220 km nga Tirana dhe vetëm 70 km nga Saranda, duke u kthyer në një ndalesë të domosdoshme për çdo udhëtar që eksploron jugun e Shqipërisë.

Himara ofron një kombinim të rrallë midis plazheve të kristalta si Livadhi, Spile, Llamani, Potami apo Filikuri – dhe natyrës së egër përreth me bimë mesdhetare, ullinj shekullorë dhe gjire të fshehura, ideale për eksplorim, snorkeling apo relaks total.

Në majë të një kodre që mbikëqyr të gjithë qytetin, ndodhet Kalaja e Himarës, një fortesë historike që daton që nga antikiteti. Qyteti i vjetër i Himarës, i ndërtuar rreth kalasë, është një labirint rrugicash guri, shtëpish tradicionale dhe pamjesh spektakolare mbi detin Jon. Kalaja ofron jo vetëm vlera kulturore dhe arkeologjike, por edhe një ndjesi magjike qetësie dhe lidhjeje me të kaluarën.

Me klimën e butë mesdhetare, mikpritjen autentike të banorëve vendas dhe gastronominë plot shije të detit dhe produkteve bio, Himara është vendi ku koha duket se ndalon për t’u jetuar me qetësi e pasion çdo moment.

Kryebashkiaku Vangjel Tavo fton qytetarët të zbulojnë historinë ndryshe përmes argëtimit dhe kreativitetit në zemër të Himarës përgjatë datave 1-3 maj.

Marrë nga ATSH