Tensionet në Lindjen e Mesme po ridimensionojnë edhe turizmin. Europianët tashmë po kërkojnë alternativa të tjera për të pushuar, e një prej këtyre destinacioneve është Shqipëria. Megjithëse pjesa më e madhe e rezervimeve janë mbyllur përpara përshkallëzimit të situatës, sërish, turistët e pavarur të minutës së fundit po rezervojnë pushimet e tyre në vendin tonë.

“Rezervimet janë përparësisht nga turistët e pavarur, pavarësisht rritjes që kemi krahasuar me një vit më parë. Janë ata turistë që zgjedhin struktura të vogla hoteliere, ose B&B. Ka edhe një rritje kërkese për pushimet e gjata, në hotelet All Inclusive, por Shqipëria nuk ka struktura mjaftueshëm që të përballojë ngritjen e nevojës. Që të jemi vendi zëvendësues për Egjiptin, ne nuk bëhemi dot, sepse nuk kemi struktura të ngjashme mjaftueshëm që ti përgjigjemi kërkesës. Edhe resortet e mëdha nuk kanë qenë të përgatitur për rritjen e kërkesës. Këto resorte kanë qenë të rezervuara më herët nga europianët. Ne jemi të limituar, kështu që turistët që mund të përthithim janë ata të pavarur. Tregu është dinamik”, thotë Aneo Hila, Operator Turistik.

Megjithatë, një tjetër faktor që po ndikon në turizëm është edhe kriza e karburantit. Shumë linja ajrore po paralajmërojnë anulim fluturimesh. Hila thotë se pasojat kanë filluar të ndihen dhe individët kanë më shumë pasiguri teksa mendojnë të rezervojnë pushimet.

“Pavarësisht se kompanitë ajrore janë të mbrojtura me çmime të fiksuara, kontratat bien poshtë. Këtu fillon problemi. Ne I kemi parë efektet e para të saj. Rritja e kostove mund të ketë efekt. Nuk është se bie kërkesa apo dëshira, por mund të mbyllen rrugët.

Nëse kostot e karburantit vazhdojnë të rriten, fluturimet do reduktohen, ose çmimet do rriten, për pasojë reduktim të prurjeve, jo të dëshirës.

Ka një kërkesë shumë të lartë, por hezitim për mbyllje pushimesh. E kemi parë këtë ngjatë gjithë muajit prill. Janë shumë të kujdesshëm me paratë që shpenzojnë. Do ketë më shumë rezervime të minutës së fundit, sesa të hershme siç ka qenë vitet e kaluara”, shprehet Hila.

Të dhënat e Instat për muajin mars tregojnë se se turistët që zgjedhin Shqipërinë vijojnë të dominohen nga tregje europiane si Italia, Gjermania dhe Mbretëria e Bashkuar, ndërsa rritje të forta po vijnë edhe nga vendet nordike, veçanërisht Danimarka, Norvegjia dhe Suedia.

Marrë nga Scan TV