Ministri për Evropën dhe Punët e Jashtme, Ferit Hoxha u shpreh sot se në kohë krizash, diplomacia mbetet mjeti më i fortë për të nxitur dialogun, për të ndërtuar besim dhe për të avancuar paqen.

Pasi mori pjesë në edicionin e 5-të të Forumit të Diplomacisë të Antalias, më 17–18 prill 2026, Hoxha tha se ishin dy ditë të plota dhe shumë produktive, të cilat ofruan një mundësi të shkëlqyer për zhvillimin e shumë takimeve dypalëshe me partnerë në rrugën e anëtarësimit në BE, duke rikonfirmuar angazhimin e palëkundur të Shqipërisë për bashkëpunimin rajonal dhe për një të ardhme të përbashkët evropiane.

Në një reagim në rrjetin sociale X, ministri Hoxha nënvizoi “se bashkëpunimi rajonal nuk është thjesht zgjedhja e duhur për vendet e rajonit, por një domosdoshmëri për stabilitetin, qëndrueshmërinë dhe integrimin evropian. Në këtë kuadër, nënvizova rëndësinë e dialogut të vazhdueshëm, besimit të ndërsjellë dhe rezultateve konkrete që afrojnë shoqëritë tona”.

“Gjithashtu, mora pjesë për herë të parë në Platformën e Paqes për Ballkanin, një nismë e ndërmarrë nga Ministri i Jashtëm i Turqisë HakanFidan, e cila synon forcimin e dialogut rajonal dhe promovimin e një kulture paqeje në rajonin tone”, tha ai.

Sipas Hoxhës, gjatë dy ditëve të forumit, diskutimet konkluduan në faktin që “në një botë gjithnjë e më të fragmentuar dhe të paparashikueshme, diplomacia mbetet instrumenti kryesor i stabilitetit”.

“Vetëm përmes bashkëpunimit të qëndrueshëm, dialogut strategjik dhe përgjegjësisë kolektive mund ta kthejmë pasigurinë në stabilitet dhe të sigurojmë një paqe të qëndrueshme, duke investuar në një të ardhme më të mirë për të gjithë”, tha Hoxha.