Ambasadorja e Republikës së Shqipërisë në Kroaci, Donika Hoxha priti në Ambasadë Kryetaren e Këshillit të Mësuesve të Gjuhës Shqipe në Kroaci, znj. Melita Orešković.

Gjatë takimit u vlerësua puna dhe kontributi i çmuar që Këshilli, së bashku me anëtarët e komunitetit shqiptar në Kroaci, japin në ruajtjen dhe promovimin e gjuhës shqipe, si dhe në përpjekjet për përfshirjen sa më të drejtë të elementeve të historisë, gjuhës dhe kulturës shqiptare në kurrikulat shkollore në Kroaci.

Biseda u ndal gjithashtu tek aktivitetet e ardhshme kulturore dhe artistike të organizuara nga Shoqata Teatrore “Mërgimtari”, të cilat përbëjnë një vlerë të shtuar për jetën kulturore të komunitetit shqiptar dhe një urë të rëndësishme lidhëse mes kulturave.

Ambasadorja vlerësoi veçanërisht angazhimin e znj. Orešković në Samitin e Diasporës dhe kontributin e saj të vazhdueshëm në promovimin e gjuhës shqipe jashtë kufijve të Shqipërisë.

Gjuha, kultura dhe arti mbeten ambasadorët më të mirë të një kombi, dhe falë përkushtimit të mësuesve të gjuhës shqipe në Kroaci, ato vazhdojnë të jetojnë dhe të përcillen me pasion tek brezat e rinj.

Burimi: Faqja zyrtare e Ambasadës