Shqipëria vazhdon të jetë ndër destinacionet turistike më tërheqëse në Evropë, duke fituar pozicion strategjik dhe me rëndësi në turizmin ndërkombëtar.

Zëvendëskryeministrja Albana Koçiu, u shpreh sot se vendi ynë ka 365 ditë destinacione, dhe 365 ditë angazhim për një turizëm të qëndrueshëm.

Koçiu tha se rritja e fluksit turistik nuk është rastësi, por rezultat i një transformimi të thellë dhe vizionit të qartë për ta kthyer këtë pasuri të jashtëzakonshme natyrore e kulturore në motor të qëndrueshëm zhvillimi, duke hapur një kapitull të ri të turizmit që tërheq, bind dhe rikthen vizitorë nga çdo vend i botës.

“Shqipëria është tabloja më e bukur e Mesdheut ku natyra ka shkrirë çdo ngjyrë dhe kontrast, në çdo stinë dhe në çdo dritë. Është përgjegjësia jonë që këtë bukuri autentike ta kthejmë në një model të qëndrueshëm suksesi”, tha Koçiu.

Turizmi ka shënuar një tjetër rekord historik gjatë vitit 2025, duke arritur 5,72 miliardë euro të ardhura nga turistët e huaj, sipas të dhënave të publikuara nga Agjencia për Media dhe Informim.

Ky nivel rekord konfirmon Shqipërinë si një destinacion gjithnjë e më tërheqës në rajon dhe në Evropë, duke sjellë një ndikim të dukshëm në zhvillimin ekonomik të vendit.

Marrë nga ATSH