Deputetja e Partisë Demokratike dhe kryetarja e Komisionit për Çështjet Evropiane, Jorida Tabaku, zhvilloi sot një takim në Kryesinë e Kuvendit me deputetin e Bundestagut gjerman, Peter Beyer (CDU), njëkohësisht drejtues i Grupit për Ballkanin Perëndimor në Bundestagun gjerman, i cili ndodhet për një vizitë në Shqipëri.

Gjatë takimit, diskutimi u përqendrua në rrugëtimin e Shqipërisë në procesin e integrimit evropian dhe sfidat që vendi përballet në këtë fazë të negociatave me Bashkimin Evropian.

Tabaku theksoi se Shqipëria ndodhet aktualisht në një udhëkryq të rëndësishëm në raport me integrimin evropian, duke nënvizuar se vendi duhet të ndërmarrë reforma reale dhe të matshme dhe jo të mbetet në kuadrin e premtimeve politike. Sipas saj, avancimi në procesin e negociatave duhet të jetë real dhe i bazuar në standarde, veçanërisht në grupkapitujt që lidhen me sundimin e ligjit, luftën kundër korrupsionit dhe krimit të organizuar.

Deputetja e PD-së argumentoi se Shqipëria ka nevojë për një proces të vërtetë transformimi institucional, si dhe për një qeveri dhe shumicë parlamentare që punon në mënyrë serioze dhe të qëndrueshme për integrimin evropian.

Gjatë bisedës, Tabaku vlerësoi mbështetjen e vazhdueshme që Gjermania i ka dhënë Shqipërisë në rrugën e saj drejt Bashkimit Evropian, duke theksuar rolin e rëndësishëm që Bundestagu dhe partnerët gjermanë kanë luajtur në avancimin e procesit të integrimit.

Megjithatë, ajo shprehu shqetësimin për drejtimin që po merr aktualisht procesi i integrimit në vend. Sipas Tabakut, procesi i integrimit evropian është një proces i plotë dhe gjithëpërfshirës që synon transformimin e shoqërisë dhe institucioneve shqiptare, dhe si i tillë nuk mund të fragmentarizohet apo të trajtohet në mënyrë të pjesshme, siç ka lënë të kuptohet së fundmi kryeministri.

Burimi ATSH