Presidenti Bajram Begaj dekretoi sot shkarkimin e Vlora Hysenit nga detyra e drejtorit të Shërbimit Informativ të Shtetit.

Vendimi i Kreut të Shtetit vjen në mbështetje të Kushtetutës, si dhe të ligjit “Për Shërbimin Informativ të Shtetit”, pas propozimit të kryeministrit Edi Rama.

Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka vendosur masën e sigurisë “Arrest në shtëpi” dhe pezullimin nga detyra për drejtuesen e Shërbimit Informativ të Shtetit, Vlora Hyseni.

Masa e sigurisë, e kërkuar nga Prokuroria e Posaçme Kundër Korrupsionit dhe Krimit të Organizuar dhe e miratuar nga GJKKO, vjen në kuadër të hetimeve të ndërmarra nga SPAK lidhur me Ergys Agasin, pjesë e dosjes së njohur me emrin “AKSHI”. Ajo dyshohet për dy vepra penale, përkrahje të autorit të krimit dhe nxjerrje të sekretit shtetëror.

Menjëherë pas masës së dhënë, kryeministri Edi Rama i cili ndodhet për vizitë zyrtare në SHBA, komunikoi lirimin e menjëhershëm nga detyra të Vlora Hysenit.

“Pafajësia ose fajësia e një bashkëpunëtori të vendosur nën akuzë është një çështje individuale përballë prokurorisë e gjykatës dhe kjo shumicë qeverisëse me mua në krye, i mbetet besnike këtij qëndrimi duke mos hyrë në meritën e asnjë çështjeje të drejtësisë dhe duke mos bërë avokatinë e askujt që përballet me drejtësinë”, u shpreh Rama.

Burimi ATSH