Shqipëria synon të përfshijë Inteligjencën Artificiale në proceset e prokurimit publik brenda vjeshtës së vitit 2027, në kuadër të bashkëpunimit me Organizatën e Kombeve të Bashkuara për Shërbimet e Projekteve (UNOPS).

Marrëveshja “Prokurojmë së bashku për Shqipërinë Evropiane” synon modernizimin e proceseve të prokurimit dhe forcimin e kapaciteteve institucionale, përmes ekspertizës dhe mbështetjes teknike të UNOPS.

Marrëveshja, e nënshkruar të mërkurën parashikon 6 muaj mbështetje teknike për Operatorin e Blerjeve të Përqendruara. Marrëveshja u nënshkrua nga administratori i OBP-së, Jonaid Myzyri, dhe drejtorja e Zyrës së UNOPS për Shqipërinë dhe Kosovën, Sabine Kania.

Bashkëpunimi do të fokusohet në rritjen e digjitalizimit dhe transparencës, zhvillimin e blerjeve strategjike dhe përdorimin e zgjidhjeve inovative në prokurimet publike.

Në këtë kuadwr, përdorimi i Inteligjencës Artificiale synon t’i bëjë proceset më efikase dhe të kontribuojë në uljen e kostove, duke sjellë një qasje të re në administrimin e prokurimeve publike.

Nisma Shqipëri-UNOPS synon gjithashtu përafrimin e proceseve me standardet ndërkombëtare, përmes teknologjisë dhe inovacionit, në funksion të një sistemi prokurimi më transparent dhe efikas.

Qeveria ka vendosur theksin tek teknologjia, si e vetmja rrugë për të luftuar korrupsionin, duke automatizuar proceset, ulur koston dhe rritur e cilësinë e shërbimeve publike.

Marrë nga ATSH