Kryeministri Edi Rama reagoi sot pasi Gjykata Administrative urdhëroi Ministrinë e Financave të zbllokojë pagat për GJKKO-në dhe Gjykatën e Durrësit.

Përmes një reagimi në rrjetet sociale, Rama tha se vendimi i Gjykatës Administrative nxit për interesin vetjak ekzekutimin e një akti që me gjasë cenon ligjin dhe interesin publik, ndërkohë që mijëra e mijëra dosje hallesh presin me vite në sirtarët e gjykatës në fjalë.

Rama siguroi se dyert e Thesarit të Shtetit i hap vetëm pushteti i pavarur legjislativ dhe Kuvendi i Shqipërisë do të bëjë detyrën e tij për këtë temë, në respekt të vendimit të Gjykatës Kushtetuese, ditën e enjte 17 shtator.

Kryeministri publikoi edhe tabelën me listën aktuale të pagave të gjyqtarëve dhe kërkesën e tyre për rritje page me rreth 51%.

Aktualisht gjyqtarët e gjykatave të shkallës së parë kanë një rrogë prej 336 600 lekë dhe kërkojnë paga në masën 508 200 lekë. Ndërsa Gjykata e Lartë dhe Prokuroria e Përgjithshme ka paga 361 080 lekë dhe kërkojnë 526 680 lekë.

SPAK dhe GJKKO kanë paga 613 224 lekë dhe kërkojnë rritje me 312 624 lekë, duke arritur pagën 925 848 lekë.

Më poshtë reagimi i plotë i kryeministrit Rama:

Sikur Gjykata Administrative të kishte standard për çdo qytetar apo institucion në hall, shpejtësinë e skëterrës me të cilën paska vepruar sot për të hapur dyert e thesarit për rritjen e rrogave të veta pa miratimin e parlamentit, unë besoj se çdo shqiptar i punësuar do ishte gati t’ia falte një gjysëm rroge vrapuesve fluturakë të Gjykatës Administrative…

Ja edhe në tabelën bashkëngjitur çfarë kërkon Gjykata Administrative në dyert e thesarit të shtetit pa kaluar fare nga parlamenti, ndërkohë që e përsëris: Dyert e thesarit të shtetit i hap vetëm pushteti i pavarur legjislativ dhe Kuvendi i Shqipërisë do të bëjë detyrën e tij për këtë temë, në respekt të vendimit të Gjykatës Kushtetuese, ditën e enjte 17 shtator.

Marrë nga ATSH