Inflacioni i matur me Indeksin e Harmonizuar të Çmimeve të Konsumit (IHÇK) sipas metodologjisë së Eurostat, arriti në 3,4% në korrik 2026, sipas të dhënave të publikuara nga INSTAT.

Rritja vjetore e çmimeve u ndikua më së shumti nga grupi “Ushqime dhe pije joalkoolike”, i cili dha një kontribut prej 1,09 pikë përqindjeje, me një rritje vjetore të çmimeve prej 3,2%.

Pas ushqimeve, ndikimin më të madh e dha grupi “Argëtim, sport dhe kulturë”, me 0,55 pikë përqindjeje, ndërsa çmimet në këtë kategori u rritën me 8,5% në krahasim me korrikun e vitit të kaluar.

Grupi “Restorante dhe shërbime akomodimi” kontribuoi me 0,53 pikë përqindjeje, me rritje vjetore të çmimeve prej 3,6%. Ndërkohë, transporti kontribuoi me 0,39 pikë përqindjeje, pasi çmimet u rritën me 4,6%.

Rritje të çmimeve u regjistruan edhe për pijet alkoolike dhe duhanin me 4,5%, shërbimet arsimore me 3,3%, si dhe kujdesin personal, mbrojtjen sociale dhe mallrat e shërbimet e ndryshme me 3,5%.

Në ndryshim nga ecuria vjetore, në raport me muajin qershor, çmimet e konsumit në korrik shënuan ulje me 0,1%.

Rënia mujore u ndikua kryesisht nga informacioni dhe komunikimi, ku çmimet ranë me 1,3%, veshjet dhe këpucët me 1,2%, sigurimet dhe shërbimet financiare me 1% dhe ushqimet e pijet joalkoolike me 0,9%.

Në kahun tjetër, rritjen më të madhe mujore e shënoi grupi i transportit, me 2,5%, ndërsa çmimet për qira, ujë, energji elektrike, gaz dhe karburante të tjera u rritën me 1%.

Të dhënat e INSTAT tregojnë se inflacioni në korrik vijoi të mbështetet kryesisht nga ushqimet dhe shërbimet, ndërsa në terma mujorë çmimet shënuan një lëvizje të lehtë në rënie.

Burimi ATSH