Vijon operacioni për izolimin dhe shuarjen e vatrës së zjarrit në fshatin Riban, në bashkinë Mallakastër.

Sipas Agjencisë Kombëtare të Mbrojtjes së Territorit, në terren janë angazhuar dy mjete zjarrfikëse dhe efektivë të Shërbimit të Mbrojtjes nga Zjarri dhe Shpëtimi, strukturat vendore të Bashkisë Mallakastër, si dhe 40 efektivë të Forcave të Armatosura.
Ndërhyrja po mbështetet nga ajri me një helikopter dhe një avion të Forcave të Armatosura.

Në operacion janë angazhuar gjithashtu forca dhe mjete në mbështetje nga bashkitë Fier, Patos, Roskovec dhe Berat.

Operacioni po zhvillohet në koordinim mes strukturave të Mbrojtjes Civile, shërbimeve zjarrfikëse, Forcave të Armatosura dhe njësive të qeverisjes vendore, me synim vënien sa më shpejt nën kontroll të vatrës dhe minimizimin e rrezikut për zonën.

Me heret Policia e Fierit njoftoi se për shkak të përhapjes së flakëve drejt zonave të banuara, shërbimet e Policisë kanë evakuuar 15 familje, si dhe bagëtitë e kafshët e tyre shtëpiake, me qëllim garantimin e sigurisë së banorëve dhe pronës.

Forcat në terren po punojnë për izolimin dhe shuarjen e vatrave të zjarrit, ndërsa vijojnë kontrollet në të gjithë territorin e prekur nga flakët.

Policia apelon qytetarët të mos ndezin zjarre për djegien e mbetjeve bimore apo për qëllime të tjera dhe të denoncojnë në numrin 112 çdo rast zjarrvënieje apo paligjshmërie.

Burimi ATSH