Ministri i Brendshëm, Besfort Lamallari ka shpallur persona të padëshiruar për një periudhë 10-vjeçare dy shqiptarë nga Maqedonia e Veriut, Valon Belën dhe Bekir Halimin, pas informacioneve dhe konsultimeve me agjencitë e sigurisë.

Në një intervistë për “Tirana Live” në ABC News, Lamallari bëri me dije se vendimi është marrë më 17 korrik në mbrojtje të interesit kombëtar.

Ai theksoi se vendi nuk do të lejojë asnjë agjendë apo nxitje dhune kundër Shqipërisë, ndërsa Policia e Shtetit mbetet e angazhuar për të garantuar rendin publik.

“Në peshën e gjithë fakteve të ardhura nga aktiviteti i dy persona është krijuar perceptimi për t’i shpallur persona të padëshiruar në Shqipëri. Vendimi u mor më 17 korrik. Kam gjykuar se është me vend shpallja persona të padëshiruar dhe dëbimi i tyre jashtë Shqipërisë, për një periudhë 10-vjeçare”, tha ai.

“Kemi pasur konsultime me agjencinë e sigurisë. Sa më shumë i afrohemi familjes europiane ne duhet të sillemi si vend anëtar duke mos lejuar asnjë axhendë kundër vendit tonë. Flitet për informacione shumë të kufizuara dhe një mbikëqyrje të vazhdueshme nga agjencitë”, theksoi Lamallari.

“Nuk hezitoja që të merrja vendime të tilla, sidomos kur bëhet fjalë për interesin kombëtar të vendit tim. Protesta u shfrytëzua nga vende jo mike. Minoranca nuk mund të pengojë pjesën tjetër të shoqërisë. Po abuzohet me protestat. Këtu vjen në lojë policia e shtetit, e cila duhet që të garantojë gërmë për gërmë rendin dhe sigurinë publike. Flitet për një demokraci. Ndërkohë është një nxitje e dhunës”, tha Lamallari.

Burimi ATSH