Administrata Doganore dhe Agjencia Kombëtare e Kontrollit të Cannabis-it nënshkruan marrëveshje bashkëpunimi për forcimin e koordinimit ndërinstitucional në kontrollin dhe monitorimin e procedurave të importit dhe eksportit të cannabis-it për qëllime mjekësore dhe industriale.

Marrëveshja u nënshkrua nga drejtori i Përgjithshëm i Doganave, Besmir Beja dhe drejtoresha e Përgjithshme e AKKC Anila Alliu.

Marrëveshja synon të krijojë një kuadër të qëndrueshëm bashkëpunimi mes dy institucioneve, duke mundësuar shkëmbimin e informacionit, koordinimin e veprimeve dhe zhvillimin e kontrolleve të përbashkëta, në përputhje me legjislacionin në fuqi.

Sipas njoftimit të Administratës Doganore, bashkëpunimi do të forcojë mekanizmat e monitorimit dhe do të rrisë efektivitetin e kontrolleve doganore, me qëllim garantimin e zbatimit të legjislacionit për aktivitetet që lidhen me cannabis-in për përdorime mjekësore dhe industriale.

Administrata Doganore vlerëson se marrëveshja përfaqëson një hap të rëndësishëm në rritjen e koordinimit ndërinstitucional, duke kontribuar në mbikëqyrjen më efikase të procedurave të importit dhe eksportit dhe në zbatimin e standardeve ligjore në këtë sektor.

Marrë nga ATSH