Administrata Tatimore ka vijuar takimet informuese në terren me fermerët dhe grumbulluesit, në kuadër të procesit të aplikimit për përfitimin e kompensimit 10%.

Drejtoria e Përgjithshme e Tatimeve bëri të ditur se në qarkun e Shkodrës u zhvillua një sesion trajnimi, ku specialistët e administratës informuan pjesëmarrësit mbi procedurën e aplikimit për kompensimin 10% përmes autofaturës, përdorimin e platformës elektronike e-Filing, dokumentacionin e nevojshëm, si dhe të drejtat dhe detyrimet e fermerëve dhe grumbulluesve.

Sipas Tatimeve, trajnimet synojnë të lehtësojnë procesin e aplikimit dhe të ofrojnë asistencë të drejtpërdrejtë për përfituesit, duke siguruar zhvillimin normal dhe në kohë të kësaj skeme mbështetëse.

Administrata Tatimore njoftoi se sesione të ngjashme informuese do të zhvillohen në të gjitha qarqet e vendit, me qëllim rritjen e informimit të fermerëve dhe grumbulluesve për procedurat e aplikimit dhe përdorimin e shërbimeve elektronike.

Procesi i aplikimit për kompensimin 10% të fermerëve ka nisur më 21 korrik dhe zhvillohet përmes platformës e-Filing, ndërsa Administrata Tatimore ka angazhuar strukturat e saj në të gjithë vendin për të ofruar mbështetje teknike dhe udhëzime gjatë gjithë periudhës së aplikimit.

Burimi ATSH