Regjistrimet online në e-Albania për klasën e parë dhe të dhjetë mbyllen këtë të premte, më 31 korrik.

Ministrja e Arsimit, Mirela Kumbaro i bëri apel sot prindërve të regjistrojnë fëmijët e tyre në klasën e parë ose klasën e dhjetë në një nga shkollat që ofron sistemi, sipas vendbanimit të tyre.

“Afati përfundon më 31 korrik, ndaj mos e lini aplikimin për ditën e fundit. Shkollat tona në të gjithë vendin po bëhen gati të mirëpresin nxënësit në vitin e ri shkollor, me ambiente të rikonstruktuara, investime të reja dhe përmirësime të realizuara në bashkëpunim me pushtetin vendor”, theksoi Kumbaro.

Sistemi do të qëndrojë i hapur deri më 31 korrik për regjistrimet në kasën e parë dhe regjistrimet në gjimnaz ose shkollë të mesme të orientuar.

Për të gjithë nxënësit që dëshirojnë të ndjekin gjimnazin me kohë të pjesshme regjistrimet do të jenë të hapura deri më 11 shtator.

Kurse nxënësit që dëshirojnë të regjistrohen në shkollat e mesme profesionale, kanë afat datën 30 shtator përmes portalit e_Albania.

Marrë nga ATSH