Përfaqësues të Departamentit të Administratës Publike (DAP), bashkë me përfaqësues nga vendet e Ballkanit Perëndimor dhe Fqinjësisë Lindore morën pjesë në workshop-in rajonal “Forcimi i sistemeve të rekrutimit dhe përzgjedhjes në shërbimin civil në vendet e zgjerimit të BE-së dhe Fqinjësisë Lindore “, organizuar nga OECD/SIGMA në Paris.

Departamenti i Administratës Publike, përfaqësuar nga drejtorët Keida Meta dhe Marcela Kërëku, ndau përvojën shqiptare mbi planifikimin e kapaciteteve njerëzore dhe ndërtimin e një sistemi më efektiv të rekrutimit, rritjen e cilësisë së përzgjedhjes përmes profesionalizmit, integritetit dhe ekspertizës në proceset e vlerësimit dhe digjitalizimin e proceseve të rekrutimit, përdorimin e teknologjisë dhe inteligjencës artificiale, si dhe mekanizmat e monitorimit për përmirësim të vazhdueshëm.

Sipas njoftimit të DAP, workshop-i ishte një mundësi fantastike për të prezantuar përvojën shqiptare, shkëmbyer praktikat më të mira me administratat partnere dhe forcuar më tej një shërbim civil profesional, transparent, bazuar në meritë, në përputhje me standardet e OECD-së dhe procesin e integrimit evropian.

Burimi ATSH