Kryeministri Edi Rama mori pjesë sot në forumin europian të inovacionit dhe sipërmarrjes “Ruhr Summit”, ku theksoi se demokracia nuk mund t’i delegohet një algoritmi.

Në fjalën e tij Rama nënvizoi se gjykimi, llogaridhënia dhe përgjegjësia mbeten ekskluzivisht njerëzore.

Sipas tij, inteligjenca artificiale ka ndikim të thellë, pasi rrit transparencën dhe e bën më të vështirë fshehjen e vendimeve të pandershme.

Ai u shpreh se përdorimi i inteligjencës artificiale në administratë u jep nëpunësve publikë më shumë informacion përpara marrjes së vendimeve.

“Algoritmi nuk është i mençur, nuk ka ndërgjegje dhe as instinkt moral. Ai nuk ka lidhje personale dhe nuk mund të ndikohet nga interesa të fshehta”, u shpreh Kryeministri Rama.

Sipas tij, qëllimi nuk është fuqizimi i teknologjisë në vetvete, por kufizimi i hapësirave të abuzimit me pushtetin njerëzor aty ku ai bëhet i padukshëm dhe i pakontrollueshëm.

Duke folur për transformimin digjital të shtetit, Rama u ndal edhe te sistemi “Diella”, duke theksuar se ai përfaqëson një hap të rëndësishëm në ndërveprimin e qytetarëve me shërbimet publike.

“Ne nuk e zgjodhëm emrin ‘Diella’ rastësisht. Dielli nuk negocion me hijet, thjesht i largon ato”, u shpreh ai.

Kryeministri shtoi se përtej “Diellës” po zhvillohet edhe sistemi “Gov AI”, i cili, sipas tij, përbën shtresën më të avancuar të inteligjencës institucionale në administratë.

““Gov AI” përfaqëson një sistem nervor të padukshëm të shtetit, që funksionon brenda institucioneve publike, jo për të zëvendësuar ministritë apo nëpunësit, por për t’i lidhur dhe fuqizuar ato”, tha Rama.

Rama theksoi se ky sistem do të mundësojë analizë më të shpejtë të të dhënave, krahasim më efikas të dokumenteve dhe integrim të informacionit ndërinstitucional.

Ai shtoi se inteligjenca artificiale shpesh përshkruhet si revolucion industrial i së ardhmes, por në fakt për qeveritë ajo përfaqëson një revolucion administrativ, që ndryshon mënyrën e funksionimit të shtetit.

Sipas Kryeministrit, shtetet historikisht janë zgjeruar duke shtuar struktura dhe personel, ndërsa me inteligjencën artificiale kapaciteti institucional rritet përmes inteligjencës dhe efikasitetit, jo vetëm përmes zgjerimit.

Burimi ATSH