Në Ditën Ndërkombëtare të Parandalimit të Konsumit të Lëndëve Narkotike, Shërbimi i Toksikologjisë dhe Adiktologjisë Klinike në QSUT përcolli mesazhin se janë marrë të gjitha masat për përballimin e sezonit veror, një periudhë gjatë së cilës, sipas statistikave të shërbimit, shënohet një rritje e ndjeshme e rasteve të intoksikacioneve nga pickimet, konsumimi i alkoolit dhe përdorimi i lëndëve psikoaktive.

Drejtoresha e QSUT, Rudina Degjoni gjatë një vizite në Shërbimin e Toksikologjisë, u shpreh se problematikat e konsumimit të lëndëve narkotike janë një problematikë ndërkombëtare, por ne duhet të jemi në gatishmëri të plotë dhe për këtë arsye, ajo i kërkoi më shumë informacion dr. Andrin Tahirit mbi marrjen e masave, antidotet në dispozicion, pritshmërinë e rasteve, protokollet që ndiqen etj.

Dr. Tahiri tha se, shërbimi i toksikologjisë është shërbim unik në nivel kombëtar, terciar, që jep asistencë mjekësore të mirëfilltë, si për helmimet akute, ekspozimet, ashtu edhe për problematikat e drogës.

“Periudha e verës është periudhë që ne gjithmonë përballemi me urgjenca të mëdha, qoftë biologjike, që janë helmimet nga pickimet prej insekteve, kafshimet nga gjarpri, merimangat, helmimet ushqimore dhe problematikat e drogave. Duke qenë periudhë vere, të rinjtë festojnë, sepse kanë kohë më shumë dhe tentojnë të eksperimentojnë dhe abuzojnë me drogat”, u shpreh shefi i Shërbimit të Toksikologjisë, Andrin Tahiri.

Doktori tha se shërbimi që ofrohet në Shërbimin e Toksikologjisë është shërbim në gatishmëri të plotë me një staf të mrekullueshëm që punon pa ndalesë 24 orë, gjatë gjithë javës.

Ajo çka është më e rëndësishme është se asistenca mjekësore mbështetet me antidotet, për të cilat mjeku thotë se janë pak, por janë jetëshpëtuese, si për shembull antidote për kafshimet nga merimanga e zezë dhe ato për kafshimet nga gjarpri.

Shërbimi i Toksikologjisë dhe Adiktologjisë Klinike në QSUT është një shërbim i pajisur me 20 shtretër.

Drejtoresha e QSUT, Rudina Degjoni tha se ky shërbim është në gatishmëri të plotë për të pritur një sezon turistik jo vetëm për qytetarët shqiptarë, por edhe për turistët të cilët e rrisin shfrytëzimin e shtretërve, megjithatë gatishmëria është 24/7, pa asnjë lloj mungese në barna dhe në materiale.

Burimi ATSH