Hyrjet e shtetasve të huaj në Shqipëri kanë shënuar rritje të ndjeshme gjatë muajit maj 2026, duke reflektuar nisjen e sezonit turistik dhe shtimin e flukseve të vizitorëve në vend.

Sipas Institutit të Statistikave (INSTAT), gjatë majit në territorin e Republikës së Shqipërisë kanë hyrë 1.143.595 shtetas të huaj, me një rritje prej 15,9% ose afro 16% krahasuar me të njëjtën periudhë të vitit të kaluar.

Në total, hyrjet e shtetasve shqiptarë dhe të huaj kanë arritur në 1.880.161, duke shënuar rritje prej 12,2%, ndërsa daljet janë regjistruar në 1.802.626, me rritje prej 8,9%.

Hyrjet e shtetasve shqiptarë janë 736.566, ndërsa daljet 735.795, me rritje respektive prej 6,9% dhe 3,6%.

INSTAT bën të ditur se Evropa Jugore përbën 70% të hyrjeve të të huajve në Shqipëri, ndërsa Evropa Perëndimore 12%.

Sipas të dhënave, në 98% të rasteve qëllimi i hyrjes së të huajve është për arsye personale, ndërsa hyrjet për biznes dhe qëllime profesionale kanë shënuar rënie prej 5,6% në maj 2026 krahasuar me një vit më parë.

“Për periudhën janar–maj 2026, hyrjet e të huajve në vend kanë shënuar rritje prej 8,2%”, bën të ditur INSTAT.

Burimi ATSH