Zaptimi i hapësirave publike, siguria në plazhe dhe siguria ushqimore do të jenë në fokus të kontrolleve gjatë sezonit turistik veror dhe do të ketë tolerancë zero ndaj çdo shkeljeje.

Kështu deklaroi Kryeinspektori i Përgjithshëm, Dashnor Sula, gjatë një takimi të zhvilluar në Shëngjin me strukturat rajonale të inspektoriateve në qarkun e Lezhës.

Sula theksoi se zonat turistike do të jenë nën monitorim të vazhdueshëm për të garantuar zbatimin e ligjit dhe mbarëvajtjen e sezonit turistik, duke kërkuar angazhim maksimal nga të gjitha strukturat inspektuese.

“Inspektoratet rajonale nuk duhet të tolerojnë individë apo subjekte që abuzojnë me ligjin në kurriz të interesit publik. Hapësirat publike dhe plazhet publike kanë qenë prej vitesh një problematikë për qytetarët dhe nuk do të lejojmë që ato të zaptohen nga subjekte të caktuara”, u shpreh ai.

Sipas Sulës, me nisjen e sezonit turistik është ngritur një task-forcë e posaçme, e cila përfshin institucionet vendore dhe qendrore, për monitorimin e përditshëm të situatës në zonat bregdetare.

“Duhet të monitorohet çdo ditë situata në plazhe. Zonat e përcaktuara për pushim dhe notim duhet të jenë të sigurta dhe nuk duhet të lejohet prania e mjeteve lundruese si motorët e ujit apo jet-skitë në këto hapësira”, deklaroi Sula.

Task-forca do të koordinojë veprimet e inspektoriateve përgjatë gjithë sezonit veror, me synim garantimin e sigurisë, rendit dhe respektimit të standardeve në zonat turistike të vendit.

Burimi ATSH