Kroçera “Seabourn Quest” me 465 turistë mbërriti sot në portin e Sarandës.

Drejtori i portit të Sarandës, Admir Malaj tha për ATSH-në se kroçiera u ankorua në orën 08:00 të mëngjesit nga Brindizi, Itali.

“Me kroçierën “Seabourn Quest” kanë ardhur 465 turistë nga shumë vende të botës si: nga Australia, Bosnja, Belgjika, Gjermania, Kanadaja, India deri edhe nga Singapori. Pas zbarkimit, vizitorët do të kenë mundësinë të eksplorojnë destinacione të ndryshme turistike në afërsi të Sarandës, duke u njohur me bukuritë natyrore, trashëgiminë kulturore dhe historike të zonës”, shtoi ai.

Sipas tij, vizitat do të përfshijnë disa nga pikat më tërheqëse turistike të jugut të Shqipërisë, të cilat vazhdojnë të zgjojnë interesin e turistëve ndërkombëtarë.

“Konkretisht turistët do të njihen me bukuritë natyrore dhe historike të zonës, duke përfshirë Butrintin, Syrin e Kaltër dhe rivierën e jugut”, tha Malaj.
Kroçera do të qëndrojë në Sarandë deri në orët e pasdites, për të vijuar më pas udhëtimin drejt destinacionit të radhës në Greqi, në Zakynthos.

Burimi ATSH