Në shtator, Tirana do të mirëpresë vitin e ri shkollor me 8 shkolla të reja, të ndërtuara sipas standardeve bashkëkohore.

Ministrja e Arsimit, Mirela Kumbaro theksoi se “shkollat që do të hapin dyert janë “Edith Durham”, “Pjetër Budi”, “Ibrahim Hima”, “Kolë Jakova”, “Shyqyri Peza”, “Mersin Duqi”, Shkolla e Mesme e Bashkuar Kërrabë dhe shkolla 9-vjeçare në rrugën “Muharrem Çaushi”.

Kumbaro tha se falë mbështetjes dhe investimit të bashkisë Tiranë, mijëra nxënës do të mësojnë në ambiente moderne, të pajisura me infrastrukturë bashkëkohore që rrit cilësinë e mësimdhënies dhe mirëqenien e fëmijëve.

Ndërkohë që në të gjithë vendin janë 42 kantiere ndërtimi të hapura në shkolla, ku po punohet së bashku me bashkitë për rikonstruksionin dhe ndërtimin e objekteve të reja arsimore.

Një ndër prioritetet kryesore të bashkisë së Tiranës mbetet edhe nisma “Rrugët e shkollave”, e cila parashikon krijimin e 20 rrugëve të reja dhe të sigurta për lëvizjen e fëmijëve drejt institucioneve arsimore.

Ky projekt synon të rrisë sigurinë rrugore pranë shkollave dhe të sjellë përmirësime të ndjeshme në peizazhin urban dhe cilësinë e jetës në kryeqytet.

Burimi ATSH