Pas përfundimit të Konferencës së 8-të Ndërqeveritare Shqipëri-BE, kryeministri i Shqipërisë Edi Rama, zëvendësministrja për Çështjet Evropiane të Qipros, Marilena Raouna dhe Komisionerja Europiane për Zgjerimin, Marta Kos zhvilluan një konferencë për shtyp.

E pyetur nëse do të jetë e mundur që Shqipëria të jetë anëtare e Bashkimit Evropian brenda vitit 2028, Kos u shpreh se mbështet vizionin e qeverisë shqiptare për të mbyllur negociatat brenda vitit 2027.

“Dua të them që ky sukses është i mundur për shkak të mbështetjes së fortë të qytetarëve shqiptarë dhe falë udhëheqjes suaj të fortë. Procesi i zgjerimit në të vërtetë, ne mblidhemi këtu sa herë që flasim për kapitujt, për piketat, për grupkapitujt, për çelje, mbyllje, por gjithçka bëjmë e bëjmë për njerëzit. Kjo mbështetje kaq e lartë në vendin tuaj është udhëheqja më e mirë që mund të ketë vendi”, tha Kos.

Kos theksoi se “Shqipëria po shfrytëzon këtë moment historik ku zgjerimi është edhe një herë përparësi e Bashkimit Evropian dhe nëse dikush e kupton që kjo dritare, kjo derë mundësie nuk mund të jetë e hapur gjithmonë, ky është vendi juaj dhe duke kuptuar këtë ju mund të jeni të suksesshëm”.

“Kur flasim për datën, ju thashë që mbështesim vizionin e qeverisë së Shqipërisë për t’i mbyllur negociatat deri në fund të 2027-ës dhe pastaj do t’i ngjitem Korabit së bashku me Kryeministrin. Kjo është e vetmja piketë shtesë mbyllëse që kam pasur sot”, tha ajo.

Marrë nga ATSH