Greqia po intensifikon përpjekjet për të ringjallur negociatat me Shqipërinë mbi përcaktimin e zonave detare, ndërsa ministri grek i Mbrojtjes, Nikos Dendias, pritet të vizitojë Tiranën javën e ardhshme për bisedime të nivelit të lartë, me synimin për të rifilluar një proces që ka mbetur i bllokuar prej vitesh.

Gjatë vizitës së tij, Dendias pritet të takohet me ministrin shqiptar të Mbrojtjes, Ermal Nufi, si dhe me kryeministrin Edi Rama.

Objektivi kryesor i udhëtimit është rikthimi në rrugën e duhur i një iniciative dypalëshe të dakordësuar fillimisht në tetor të vitit 2020, kur të dy vendet shpallën synimin për ta çuar mosmarrëveshjen për kufirin detar në Gjykatën Ndërkombëtare të Drejtësisë.

Athina dhe Tirana po përpiqen të shfrytëzojnë atë që zyrtarët grekë e përshkruajnë si një fazë pozitive në marrëdhëniet dypalëshe.

Kjo nismë vjen pas një vizite të fundit të Ramës në Greqi dhe në kuadër të mbështetjes së Athinës për përshpejtimin e procesit të anëtarësimit në Bashkimin Evropian të vendeve të Ballkanit Perëndimor.

Në qendër të diskutimeve është përgatitja e një marrëveshjeje formale që do t’u lejonte të dy vendeve t’ia paraqesin për gjykim ndërkombëtar mosmarrëveshjen mbi Zonën Ekskluzive Ekonomike (EEZ).

Procesi u ndërpre pas një vendimi nga Gjykata Kushtetuese Shqiptare e cila ndaloi progresin dhe e la çështjen të pazgjidhur.

Megjithatë, zyrtarët grekë besojnë se kushtet tani mund të jenë më të favorshme për një rifillim të procesit.

Sipas burimeve, presidenti shqiptar Bajram Begaj duket i gatshëm të autorizojë bisedimet teknike të nevojshme për të çuar përpara procesin.

Të dyja palët do të duhet ende të kapërcejnë një sërë pengesash procedurale.

Një nga sfidat kryesore mbetet kapaciteti i kufizuar teknik i Shqipërisë për të mbështetur punën komplekse ligjore dhe diplomatike që kërkon një çështje në Hagë, faktor që mund të ngadalësojë progresin pavarësisht vullnetit politik nga të dyja anët.

Zyrtarët grekë kanë bërë të ditur se asistenca teknike mund të ofrohet si pjesë e angazhimit më të gjerë të Athinës për të mbështetur vendet e Ballkanit Perëndimor në përmbushjen e objektivave të tyre për integrimin evropian.

Kontakte të tjera diplomatike priten në muajin qershor, kur ministri i Jashtëm grek, George Gerapetritis, është planifikuar të vizitojë Tiranën për një konferencë ministrore të fokusuar në mbështetjen për Ukrainën dhe sigurinë në Evropën Juglindore.

Takimi pritet gjithashtu të krijojë mundësi për diskutime të tjera dypalëshe, përfshirë rrugën e Shqipërisë drejt anëtarësimit në Bashkimin Evropian dhe çështje të tjera rajonale.

Zyrtarët grekë e shohin përparimin në mosmarrëveshjen detare si një shembull të mundshëm se si vendet fqinje mund të zgjidhin mosmarrëveshje të kahershme përmes mjeteve ligjore dhe diplomatike, duke forcuar njëkohësisht stabilitetin dhe bashkëpunimin rajonal.

Marrë nga ATSH