Këshilli i Ministrave miratoi sot vendimin për përcaktimin e procedurave për hartimin e Planit Kombëtar për Zhvillimin Rajonal dhe Kohezionin (PKZHRK) planeve rajonale dhe programit operacional për zhvillimin rajonal dhe kohezionin (POZHRK).

Sipas këtij vendimi, “KZHRK-ja dhe POZHRK-ja hartohen nga Komiteti Kombëtar për Zhvillimin Rajonal dhe Kohezionin (KKZHRK) në cilësinë e organit përgjegjës pёr të gjithë territorin e Republikës së Shqipërisë. PRZHRK-ja hartohet nga bordi i monitorimit të zhvillimit rajonal përkatës, në cilësinë e organit përgjegjës, në nivelin e kufijve territorialë të rajonit zhvillimor. Ndërkohë në cilësinë e sekretariatit teknik, Fondi Shqiptar i Zhvillimit siguron mbështetje administrative dhe teknike për përgatitjen e këtyre dokumenteve planifikuese e koordinuese”.

Sipas vendimit, Komiteti Kombëtar për Zhvillimin Rajonal dhe Kohezionin do të hartojë Planin Kombëtar për Zhvillimin Rajonal dhe Kohezionin, si dhe programin operacional, ndërsa planet rajonale do të përgatiten nga bordet e monitorimit të zhvillimit rajonal.

Në këtë proces, Fondi Shqiptar i Zhvillimit do të shërbejë si sekretariat teknik, duke mbështetur analizat, koordinimin ndërinstitucional dhe procesin e konsultimeve publike me aktorët e zhvillimit.

“Dokumentet e planifikimit e të koordinimit hartohen në zbatim të orientimeve të politikës kombëtare të zhvillimit rajonal, duke garantuar përputhshmërinë me objektivat e zhvillimit të qëndrueshëm dhe marrëveshjet e bashkëpunimit e të financimit ndërmjet Këshillit të Ministrave, Bashkimit Evropian, institucioneve financiare ndërkombëtare dhe palëve të tjera, në rastet kur dhe për aq sa ndikojnë në përmbajtjen e këtyre dokumenteve”, thuhet në VKM.

Vendimi parashikon gjithashtu konsultime të gjera me institucionet qendrore e vendore, partnerët ndërkombëtarë dhe Bashkimin Evropian, si dhe rishikim të dokumenteve në varësi të ndryshimeve ekonomike, sociale dhe territoriale.

Burimi ATSH