Një delegacion i Agjencisë për Zhvillim Bujqësor dhe Rural (AZHBR) mori pjesë në edicionin e 65-të të Konferencës Panta Rhei që u zhvillua në Dublin.

Konferenca Panta Rhei është një nga platformat më të rëndësishme evropiane që bashkon ekspertë të teknologjisë, inovacionit dhe administrimit nga agjencitë e pagesave të vendeve të BE-së, shteteve anëtare dhe vendeve kandidate.

Gjatë punimeve të konferencës, përmes sesioneve teknike, workshop-eve dhe diskutimeve profesionale, delegacioni shqiptar u njoh nga afër me zhvillimet më të fundit në sistemet digjitale dhe teknologjitë që mbështesin zbatimin e politikave moderne në bujqësi.

AZHBR bëri të ditur se pjesëmarrja në këtë aktivitet vlerësohet si një hap i rëndësishëm për forcimin e kapaciteteve institucionale të Shqipërisë dhe avancimin e Sistemit të Integruar të Administrimit dhe Kontrollit (IACS), i cili është një element kyç për menaxhimin dhe monitorimin e mbështetjes në sektorin bujqësor.

Gjatë takimeve, shkëmbimi i eksperiencave me vendet e Bashkimit Europian dhe ato kandidate u theksua si thelbësor për ndërtimin e sistemeve më efikase, të qëndrueshme dhe në përputhje me standardet evropiane në fushën e bujqësisë dhe zhvillimit rural.

Burimi ATSH