Përmirësimi i cilësisë së ligjbërjes dhe rritja e transparencës në vendimmarrje ishin në fokus të një takimi të zhvilluar sot me deputetë të Kuvendit, përfaqësues të institucioneve shtetërore, shoqërisë civile dhe partnerëve ndërkombëtarë.

Diskutimet u përqendruan në nevojën për procese më gjithëpërfshirëse, që garantojnë pjesëmarrje më të gjerë dhe përafrim më të shpejtë me standardet e Bashkimit Evropian.

Në takim morën pjesë edhe ambasadori i Bashkimit Evropian në Shqipëri, Silvio Gonzato, si dhe ambasadori i Suedisë, Niklas Strom, të cilët theksuan rëndësinë e përfshirjes së të gjithë aktorëve në procesin ligjbërës.

Gjatë diskutimeve u nënvizua se ligjet cilësore ndërtohen përmes konsultimeve të hapura dhe transparente, ku çdo palë e interesuar ka mundësi të kontribuojë.

Ambasadori i BE-së, Silvio Gonzato, theksoi rolin vendimtar të proceseve gjithëpërfshirëse në rrugën e Shqipërisë drejt integrimit evropian.

“Një qasje që përfshin të gjithë shoqërinë është kyçe për integrimin e Shqipërisë në BE. Proceset gjithëpërfshirëse dhe konsultimet në kohë ndërtojnë besim publik dhe rrisin ndjenjën e përkatësisë, sepse i ndihmojnë qytetarët të kuptojnë se si reformat mund të përmirësojnë dhe ndikojnë jetën e tyre të përditshme”, theksoi Gonzato.

Ai vuri në dukje gjithashtu rolin qendror të Kuvendit në këtë proces, duke shtuar.

“Në këtë proces, Parlamenti luan një rol qendror duke garantuar mbikëqyrje, transparencë dhe cilësi në ligjbërje”, shtoi ai