Drejtori i Përgjithshëm i Doganave Besmir Beja ka zhvilluar takime me përfaqësues të agjencive doganore në Tiranë dhe Durrës, në kuadër të dialogut të vazhdueshëm me komunitetin e biznesit dhe aktorët e procesit doganor.

Në këto takime, kreu i Doganave theksoi rolin e rëndësishëm të agjencive doganore si hallkë ndërmjetëse mes operatorëve ekonomikë dhe administratës, duke nënvizuar nevojën për komunikim të rregullt dhe bashkëpunim efektiv.

Beja vuri në dukje se objektivi kryesor mbetet rritja e saktësisë dhe transparencës në deklarimet doganore, me qëllim shmangien e gabimeve dhe forcimin e integritetit të sistemit.

Po ashtu, u theksua se administrata doganore është e angazhuar në procesin e përafrimit me standardet e Bashkimit Evropian, ku prioritet mbeten zhvillimi i sistemeve IT, forcimi i kapaciteteve njerëzore dhe bashkëpunimi me administratat homologe evropiane.

Burimi ATSH