Agjencia për Zhvillim Bujqësor dhe Rural (AZHBR) zhvilloi një takim informues me fermerë dhe agrobiznese në qytetin e Shkodrës, në bashkëpunim me përfaqësues të bankave të nivelit të dytë, lidhur me nismën e qeverisë për kredi të butë me garanci sovrane.

Gjatë takimit u diskutua mbi vijimin e procesit të aplikimit, procedurat që duhet të ndiqen, si dhe udhëzimet praktike për përfitimin nga kjo skemë financimi, e cila synon të mbështesë investimet në sektorin bujqësor dhe rural.

Pjesëmarrësit u njohën me mundësitë që ofron kjo kredi për zhvillimin e investimeve në fusha të ndryshme, përfshirë bujqësinë dhe blegtorinë, agropërpunimin, mekanizimin e bujqësisë, turizmin rural dhe akuakulturën detare.

Kredia e butë me garanci sovrane ofrohet me kushte lehtësuese për fermerët dhe sipërmarrësit në sektor, duke përfshirë normë interesi prej 2% dhe mbulim kolaterali deri në 70%.

AZHBR theksoi se aplikimet për këtë skemë financimi vijojnë dhe mund të kryhen pranë bankave të nivelit të dytë, duke u bërë thirrje të interesuarve të shfrytëzojnë këtë instrument mbështetës për zhvillimin e investimeve të tyre.

Kjo nismë vlerësohet si një instrument i rëndësishëm për nxitjen e zhvillimit rural dhe forcimin e kapaciteteve prodhuese në sektorin bujqësor në vend.

Burimi ATSH