Këshilli i Ministrave miratoi sot vendimin për indeksimin e bazës së vlerësuar të vitit 2024, me një koeficient indeksi 6,4%, për llogaritjen e pensioneve.

Vendimi, i propozuar nga Ministria e Ekonomisë dhe Inovacionit, përcakton që indeksi i miratuar të aplikohet për bazën e vlerësuar individuale vjetore, e cila llogaritet mbi kontributet e paguara dhe rivlerësimet deri në vitin 2024.

Ky indeks do të përdoret për llogaritjen e masës fillestare mujore të pensioneve, për personat që përfitojnë pension nga 1 janari 2026 e në vazhdim.

Baza e vlerësuar, pas aplikimit të indeksit, nuk mund të tejkalojë trefishin e pagës minimale kombëtare për periudhën 1994-2001 dhe pagën maksimale për periudhën 2002 e në vazhdim.

Koeficientet e indeksimit të bazës së vlerësuar të vitit 2024 për efekt të llogaritjes së pensioneve, dhe që do të prekë të gjithë qytetarët që përfitojnë të drejtën për pension pas datës 1 janar 2026.

Ky hap synon që pensionet e reja të jenë në përputhje me kontributet e derdhura dhe të sigurojë një trajtim të drejtë për të gjithë aplikantët.

Koeficienti i indeksimit i propozuar në këtë vendim, do të ndikojë në rritjen e bazës së vlerësuar për rreth 40 mijë persona që aplikojnë për pensione të reja nga janari i vitit 2026, duke bërë të mundur që pensionet e tyre të jenë të harmonizuara me kontributet e derdhura.

Formula aktuale e përcaktimit të pensionit fillestar, e ndryshuar me reformën e vitit 2014, përcakton një pension bazë, i cili është rreth 9.800 lekë dhe një shtesë mbi të që është 1% për çdo vit sigurimi, shumëzuar me bazën mesatare të vlerësuar. Ky sistem synon të sigurojë që pensionet të jenë sa më të drejta dhe në përputhje me kontributet e dhëna.

Burimi ATSH