Ministrja e Arsimit Mirela Kumbaro, paraqiti në Kuvend projektligjin për krijimin e Agjencisë Kombëtare të Shërbimeve Arsimore, një reformë që synon të transformojë rrënjësisht mënyrën se si ofrohen shërbimet për qytetarët në arsim.

Që në nisje të fjalës së saj, ministrja theksoi se ndryshimi nuk është i papritur, por rezultat i një procesi të gjatë reflektimi.

“Reformimi i Qendrës së Shërbimeve Arsimore nuk është një projekt që lindi papritur, por është një punë reflektimi që ka nisur prej vitit 2019. Do të kemi një partner shumë prestigjioz, siç është Qendra e Vleresimeve e Universitetit te Kembrixhit – të cilët do të shoqërojne ngritjen e Agjencisë së re në procesin e teknologjisë dhe të trajnimeve disa vjeçare. Pse lind nevoja e reformimit? Sepse po flasim për një institucion që ofron rreth 158 mijë shërbime ne vit. Janë shërbime shumë sensitive, me afate kohore, ndonjëherë edhe jetike – për qytetarët, sic mund të jetë njehsimi i diplomës ndërkombëtare, pasi ka efekt direkt në punësim, apo në vijimin e studimeve në Shqipëri. Dhe të gjitha këto kryhen në kushte jo aq optimale sa do të dëshironim, për shkak të kapaciteteve të kufizuara teknologjike, logjistike dhe njerëzore!”, tha Kumbaro.

”Në këtë kuptim, reformimi i Qendrës së Shërbimeve Arsimore në Agjenci të Shërbimeve Arsimore nuk është thjesht një ndryshim emërtese apo statusi juridik, por një transformim me ndikim të drejtpërdrejtë në cilësinë e administrimit të shërbimeve, në rritjen e kapaciteteve institucionale dhe në forcimin e besimit publik. Duhet thënë gjithashtu, dhe e theksoj, se me miratimin e këtij ligji, plotësohen edhe të gjitha piketat e Kapitullit 26 të anëtarësimit në Bashkimin Europian, duke e bërë kapitullin e parë që Shqipëria përmbyll në këtë proces”, vijoi fjalën e saj Ministrja e Arsimit Mirela Kumbaro.

Duke iu përgjigjur edhe pretendimeve të opozitës, Kumbaro tha se Agjencia e Shërbimeve Arsimore do të mbikëqyret nga Ministria e Arsimit.

”Veprimtaria e Agjencisë Kombëtare të Shërbimeve Arsimore do të mbikëqyret nga ministria përgjegjëse për arsimin, e cila do të ketë për detyrë të verifikojë zbatimin korrekt të politikave dhe strategjive kombëtare në fushën e arsimit. Në projektligjin për krijimin e Agjencisë Kombëtare të Shërbimeve Arsimore, sipas ligjit për agjencitë autonome, parashikohet drejtimi nga një Keshill drejtues i cili është një ndër instrumentet me të cilët administrohen agjencitë autonome. Ky keshill do të drejtohet nga ministri përgjegjës për arsimin dhe vendimet me te rendesishme te Keshillit, që kanë të bëjnë me buxhetin, pagat, dhe tarifat per sherbimet publike, do të kalojnë dhe në një filtër tjetër dhe do te miratohen me vendim te Këshillit te Ministrave”, u shpreh Ministrja e Arsimit.

Marrë nga ATSH