Programi “Toka në Shkollë” po nxit një qasje të re të lidhjes mes nxënësve dhe natyrës, përmes aktiviteteve praktike dhe mësimeve ndërvepruese.

Në Ditën Botërore të Tokës, ministrja e Arsimit, Mirela Kumbaro u shpreh se ky program po zgjerohet çdo ditë në shkollat në të gjithë vendin.

Sipas Kumbaros, “nxënësit janë entuziastë dhe punojnë bashkë me mësuesit që kopshtet në shkolla të gjelbërohen”

“Nga mbjellja e fidanit të parë deri te vjelja e produkteve, fëmijët po prekin nga afër ciklin e rritjes së bimëve. Ministria e Arsimit mbështet çdo hap të këtij projekti, duke siguruar të gjitha materialet e nevojshme për t’i angazhuar nxënësit përtej orarit të mësimit si pjesë e programit të madh pas shkolle”, tha Kumbaro.

“Toka në Shkollë” është një nismë e Ministrisë së Arsimit, e shtrirë në shkolla në mbarë vendin, ku nxënësit jo vetëm zhvillojnë aftësi praktike, por edhe ndërgjegjësohen për rëndësinë e mjedisit dhe ushqyerjes së shëndetshme.

Gjithashtu ky program synon të zhvillojnë aftësitë praktike për kultivimin, me synim lidhjen e fëmijëve dhe të rinjve me natyrën dhe traditat, si një mjet për edukimin mjedisor dhe jo vetëm.

Burimi ATSH