Ministri i Bujqësisë dhe Zhvillimit Rural, Andis Salla, zhvilloi një vizitë në Vaun e Dejës, ku prezantoi një nga risitë e Skemës Kombëtare të Mbështetjes për vitin 2026, përfshirjen për herë të parë të sektorit të mbarështimit t derrave.

Gjatë ndalesës në fermën e Emaldin Smakaj, Ministri Salla bëri të ditur se kërkesa e tij dhe e shumë fermerëve të tjerë tashmë është bërë realitet.

“Premtimi i dhënë për mbështetjen e këtij sektori është mbajtur dhe shumë shpejt do të nisin edhe aplikimet”, u shpreh ai.

Për herë të parë në këtë sektor do të jepen 7,000 lekë për çdo fermer që mbarështon mbi 5 dosa, si një nxitje konkrete për zhvillimin e blegtorisë dhe rritjen e prodhimit vendas.

Në vijim të vizitës, ministri Salla zhvilloi një takim me një grup fermerësh të zonës që merren me mbarështimin e derrave, ku prezantoi në detaje masën e re dhe rëndësinë e përfshirjes në skemat mbështetëse.

“Kjo është një masë që vjen si përgjigje direkte ndaj kërkesave tuaja dhe synon të mbështesë zgjerimin e aktivitetit, formalizimin e sektorit dhe rritjen e konkurrueshmërisë”, theksoi ministri.

Ministri theksoi se përmes kësaj mase të re dhe politikave mbështetëse, synohet forcimi i sektorit të blegtorisë dhe krijimi i më shumë mundësive ekonomike për fermerët në të gjithë vendin.

Burimi ATSH