Ministri i Mbrojtjes, Ermal Nufi, në mbyllje të vizitës në Kosovë, zhvilloi një takim në Komandën Perëndimore të KFOR-it në Pejë.

Gjatë kësaj vizite, ai takoi efektivët shqiptarë të dislokuar në këtë mision, duke i cilësuar ata si një shembull i përkushtimit dhe profesionalizmit të Forcave të Armatosura.

Ai theksoi se Shqipëria vijon të japë një kontribut të rëndësishëm në këtë mision ndërkombëtar, duke dëshmuar aftësi operacionale dhe besueshmëri si aleat.

“Në ndalesën përmbyllëse të vizitës në Kosovë, pata kënaqësinë dhe krenarinë të ndaloja në Komandën Perëndimore të KFOR-it në Pejë, ku takova djemtë dhe vajzat e “Shqiponjës”, një shembull i gjallë i përkushtimit dhe profesionalizmit të Forcave tona të Armatosura”, u shpreh Nufi për vizitën.

“Shqipëria vijon të japë një kontribut të spikatur në këtë mision, duke dëshmuar jo vetëm aftësi operacionale, por edhe besueshmëri si aleat në çdo detyrë që i besohet”, theksoi ministri.

Sipas tij, vlerësimi për trupat shqiptare është konfirmuar edhe nga drejtuesit e misionit në terren.

“Vlerësimi dhe mirënjohja për angazhimin e personelit tonë, të shprehura edhe nga Komandanti i Bazës, Kolonel Mora, janë dëshmi e qartë se Forcat tona të Armatosura bëjnë dallimin në terren, duke kontribuar drejtpërdrejt në sigurinë, stabilitetin dhe perspektivën e qëndrueshme të rajonit dhe më gjerë, në gjithë hapësirën euroatlantike”, tha Nufi.