Reshjet e shiut me intensitet të lartë që nisën mbrëmjen e djeshme kanë përfshirë të gjithë vendin, duke krijuar situata të vështira veçanërisht në zonat veriore dhe verilindore.

Strukturat nën varësinë e Ministrisë së Infrastrukturës dhe Energjisë (MIE) dhe të institucioneve të linjës janë angazhuar maksimalisht për monitorimin dhe menaxhimin e situatës.

Zëvendëskryeministrja Belinda Balluku, njëherësh ministre e Infrastrukturës dhe Energjisë, ndau në rrjete sociale raportin mbi situatën nga moti i keq dhe masat e marra nga MIE deri në orën 13:00.

Situata në akset rrugore: Në Tropojë, Kukës dhe aksin Skurraj–Burrel janë regjistruar rënie gurësh dhe inertesh, ndërsa në aksin Laç–Ura e Drojës një segment u përmbyt për shkak të daljes së përroit nga shtrati. Ekipet e mirëmbajtjes kanë ndërhyrë menjëherë për pastrimin e karrexhatave dhe rikthimin e qarkullimit normal.

Energjia elektrike: Operatorët e rrjetit të shpërndarjes (OSSH) kanë angazhuar rreth 1500 punonjës dhe po menaxhojnë 26 fidera jashtë funksionit. Furnizimi në rang vendi është përmirësuar në rreth 70%, ndërsa rajonet Shkodër, Dibër, Durrës, Vlorë dhe Berat janë plotësisht normalizuar. Rrjeti i transmetimit dhe hidrovorët funksionojnë normalisht.

Uji i pijshëm: Furnizimi paraqitet optimal, pa ndërprerje në stacionet e pompimit. Grupi i punës i MIE është në gatishmëri me 40 ekipe dhe mbi 50 mjete për menaxhimin e situatës.

Transporti detar dhe ajror: Portet e Durrësit dhe Sarandës operojnë normalisht, ndërsa aeroporti “Nënë Tereza” nuk raporton probleme apo ndërprerje në operime.

“MIE vijon monitorimin intensiv, sidomos në zonat me risk të shtuar si baseni i lumit Drin, ndërsa të gjitha strukturat operative janë të gatshme për ndërhyrje të menjëhershme”, njoftoi Balluku.

Burimi ATSH