Në Tiranë u zhvillua forumi ndërkombëtar Tax Inspectors Without Borders (TIWB-CI), ku u diskutua sfida e evazionit fiskal dhe rëndësia e bashkëpunimit ndërkombëtar mes agjencive tatimore dhe doganore.

Në këtë aktivitet, drejtori i përgjithshëm i Doganave, Genti Gazheli, theksoi se lufta kundër evazionit nuk njeh kufij dhe se teknologjia, të dhënat dhe partneritetet ndërkombëtare janë armët kryesore për rritjen e efikasitetit.

Ai nënvizoi përdorimin e sistemeve si ASYCUDA, Inteligjencën Artificiale dhe bashkëpunimin me institucione si Guardia di Finanza, UNDP, OECD dhe SECO, për të analizuar rreziqet dhe për të përmirësuar të ardhurat.

Sipas Gazheli, rezultatet e arritura flasin vetë për 2 miliardë euro të ardhura në vetëm 10 muaj, pavarësisht sfidave ekzistuese.

Forumi nënvizoi gjithashtu rëndësinë e transparencës, digjitalizimit dhe partneriteteve, si elementë kyç për krijimin e një ekonomie të ndershme dhe efikase.

Ky aktivitet forcon përpjekjet e Shqipërisë për të modernizuar administratën tatimore dhe doganore, duke përdorur praktikat më të mira ndërkombëtare dhe teknologjinë për të luftuar evazionin fiskal.

Burimi ATSH